போலீஸ் ...... போலீஸ் .... போலீஸ்.....

வணக்கம்.   எனது முந்தைய இடுகை:  கவர்னர்னா கொம்பா முளைச்சு இருக்குது?   வாசித்து விட்டு சிலர், உணவு பரிமாறிய அந்த பெண்ணுக்கு வேலை போகாமல் இருந்தது குறித்து பின்னூட்டம் இட்டு இருந்தார்கள்.
இங்கு  சட்டம் ஒழுங்கு முறை,  கடமையை செய்வதற்காக  ஒத்துழைக்குமே தவிர, தடை செய்வதற்காக  அல்ல.

  அமெரிக்காவில்,  போலீஸ் துறைதான்  டிராபிக் பொறுப்பையும் பார்த்துக் கொள்கிறது.  (தனியாக டிராபிக் போலீஸ் என்று கிடையாது)    சாலை விதிகளை மீறும் போது, ஓட்டுனர்களை நிறுத்தி எச்சரித்து அனுப்பவோ, அபராதம் கட்ட சொல்லி "fine"  டிக்கெட் கொடுக்கவோ அவர்களுக்கு அதிகாரம் உண்டு.  மாட்டிக் கொண்டவர்கள் யாராக  இருந்தாலும்,    போலீஸ் அதிகாரத்துக்கு உட்பட்டவர்களே.  "எனக்கு அவரைத் தெரியும், இவரையும் தெரியும்," என்று பெருமை பேசுவது,  போலீஸ் (cop )காரர்களின் எரிச்சலைத் தான் சம்பாதித்துக் கொள்ள வைக்கும்.   தங்களை மறைமுகமாக மிரட்டுவதாகவே  கருதுகின்றனர்.

பெரும்பாலான ஊர்களில்,  போலீஸ்க்கும் அவரது வேலைக்கும் பாதுகாப்பும் உத்தரவாதமும் அளிக்கும் வகையில் - போலீஸ்  யாராவது செல்வந்தர் வீட்டினரையோ   அல்லது அரசியல்வாதிகளின் வீட்டினரையோ  தவறு செய்யும்போது நடவடிக்கை எடுத்ததற்காக, அந்த போலீஸ் தண்டிக்கப்படாமல் இருக்கும்படி சட்டம் உள்ளது.  நடவடிக்கை எடுத்த போலீஸ்க்கு மேலிடத்தில் இருந்து suspension,  transfer or dismissal பிரச்சினை இல்லை.  அதனால் எதை பற்றியும் - யாரைப்  பற்றியும் கவலைப்படாமல் கடமையை செய்ய முடிகிறது.

நிலைமை தலைகீழ்:   

  புஷ் ஜனாதிபதியாக இருந்தபொழுது, அவரின் மகள் ஜென்னா,  21 வயது ஆகும் முன்னே மதுபானம் வைத்து இருந்த குற்றத்துக்காக போலீஸ் துறையினரால் தண்டிக்கப்பட்டார்.
"Jenna W. Bush, one of President Bush's 19-year-old twin daughters, was cited for alcohol possession by a minor Friday morning, the Austin Police Department said."

மேலும், போலீஸ்க்கு லஞ்சம் கொடுக்க முயன்றவர்களை அந்த இடத்திலேயே கைது செய்வர்.  வெறும் அபராத தொகையோடு போய் இருக்க வேண்டியது,  அரெஸ்ட் வரை கொண்டு வரத்தான் லஞ்சம் "உதவி" இருக்கும்.
Fanning என்ற போலீஸ் கூறியுள்ளதை பாருங்கள்:   "Never try to buy off a cop.  In those instances where they've offered me a bribe," Fanning said,  "I loved making those arrests."
http://finance.yahoo.com/family-home/article/110666/what-not-to-say-when-pulled-over-by-a-cop

நேற்று,  நாங்கள் ஒரு கடைக்கு சென்ற பொழுது,  அங்கே வாசலில் ஒரு போலீஸ் நின்று கொண்டு யாரிடமோ பேசி கொண்டு இருந்தார். என் குழந்தைகள் அவரை பார்த்து விட்டு உள்ளே போகாமல்  தயக்கத்துடன் நிற்க,  அவர் புன்னகைத்து விட்டு,  அவர்களுக்கு ஹலோ சொன்னார்.  பிறகு, ஒரு கோமாளி படம் போட்ட ஸ்டிக்கர் ஒன்றை அவர்களுக்கு கொடுத்தார்.  நான் எதற்கு என்று கேட்ட பொழுது,  "குழந்தைகள் போலீஸ் கண்டு பயப்படக் கூடாது.  பின்னால் எதுவும் தேவைப் பட்டால், அவரை அணுகி உதவி கேட்கும் எண்ணம் அவர்களுக்கு வர வேண்டும்.  நான் அவர்களின் நண்பன் தான் என்று காட்டவே அப்படி செய்தேன்," என்றார்.  (பாசக்கார பயபுள்ள!)

விதிவிலக்குக்கு உள்ளானோர் இல்லாமல் இல்லை.....  அப்படிப்பட்ட போலீஸ் பிடிபட்டால்,  தண்டனையில் இருந்தும் தப்ப முடியாது.  சரி....சரி...... இனி, இங்கு நடந்த சில வேடிக்கையான  கைதாகிய சம்பவங்கள்  பற்றி பார்ப்போமா?   சீரியஸ் ஆக வேலை செய்து கொண்டு இருக்கும் போலீஸ்க்கு,   இந்த காமெடி பீஸ்கள் மூலம் சிரியஸ் டைம்க்கு பஞ்சம் இல்லை.

நான் "நம்பிட்டேன்":  

Melvin Jesse Blain, 31,  கடந்த வாரம் North Charleston என்ற ஊரில் உள்ள Wachovia வங்கி கிளைக்கு கொள்ளையடிக்க சென்று,  அங்கு இருந்த கிளார்க்கிடம்  ஒரு துண்டு பேப்பர் நீட்டினார்.   அதில்,  தனக்கு உடனடியாக $30,000 பணத்தை $100 நோட்டுக்களாக எடுத்து தரும் படி மிரட்டி எழுதி இருந்தார்.  அந்த பெண்ணும் பயப்படாமல் சீரியஸ் ஆக முகத்தை வைத்து கொண்டு,  "சாரி. என்னிடம் இப்பொழுது அவ்வளவு பணம் cash ஆக இல்லையே," எனவும்,  மெல்வின் அதை நம்பிவிட்டான்.  அந்த பெண்ணுக்கு நன்றி சொல்லிவிட்டு,  (மரியாதை தெரிஞ்ச பயபுள்ள) ,  வங்கியை விட்டு வெளியேறி நடக்கவும், அந்த பெண் போலீஸ்க்கு போன் செய்து விட்டாள்.  உடனே வந்த போலீஸ்,  வெளியே நடந்து கொண்டு இருந்தவனை வங்கியை கொள்ளையடிக்க முயன்ற குற்றத்துக்காக கைது செய்தது.

முகமும் முகவரியும்: 

மேரிலன்ட் (Maryland) மாநிலத்தில் உள்ள Bowie என்ற ஊரில்,   கொள்ளையடிக்க வந்தவன் ஒரு துண்டு சீட்டில் தனக்கு வேண்டிய பணத்தை எழுதி, அந்த அளவு பணத்தை சத்தமில்லாமல் தன்னிடம் தந்து விடுமாறு கிளார்க்கிடம்  சொன்னான்.  அவரும் கொடுத்து விட, சந்தோஷமாக பணத்துடன் நேராக தன் வீட்டுக்கு சென்றான்.  ஆனால் வீட்டுக்குள் நுழையும் முன் போலீஸ் அவனை சுற்றி வளைத்து பிடித்தது. அவனுக்கோ ஆச்சர்யம்!  தன் வீடு எப்படி போலீஸ்க்கு தெரிந்தது என்று......  அவன் கொடுத்த துண்டு சீட்டில் தான் மேட்டர் இருந்தது.  அவன் தனது கொள்ளை மிரட்டலை எழுத உபயோகித்து இருந்தது:    அவன் முகவரி மற்றும் விவரங்களுடன் இருந்த பேங்க் deposit ஸ்லிப்பின் பின்னால்.  ( "புத்திசாலி" பயபுள்ள!)

தர்ம அடி: 

இந்த சம்பவம் நாங்கள் மயாமியில் குடி இருந்த பொழுது நடந்தது.  பாக்கிஸ்தானியர் ஒருவரின் குடும்பத்தினரால் "Miami Subs"  என்ற உணவக கிளை  நடத்தப்பட்டது.   ஒரு நாள், கடையை திறந்து உள்ளே எல்லாம் ஆயத்தப் படுத்தி கொண்டு இருந்த பொழுது, இருவர் கொள்ளையடிக்க வந்தனர்.  ஒருவன், வாசலிலேயே காவலுக்கு நிற்க - கைத் துப்பாக்கி வைத்து இருந்த இன்னொருவன் கடைக்குள் நுழைந்தான்.   உள்ளே நின்று கொண்டு இருந்த கடை உரிமையாளரை மிரட்டி, பணம் கேட்டு இருக்கிறான்.  தன் பின்னால்,  அடுத்த அறையில் இருந்து வந்து கொண்டு இருந்த உரிமையாளரின் தம்பியை அவன் கவனிக்கவில்லை.  தம்பி நிலைமையை புரிந்து கொண்டு,  துப்பாக்கி வைத்து இருந்தவனின் பின் பக்கமாக பாய்ந்து அவன் தலையில் அடித்து விட்டு, துப்பாக்கியை பிடுங்கி  விட்டான். இவனது கூக்குரலை கேட்ட காவலுக்கு நின்று கொண்டு இருந்தவனோ, பயத்தில் ஓடி விட்டான்.  (துப்பாக்கி இருந்தவனுக்கே இந்த நிலைமையா என்று நினைத்தானோ என்னவோ?  பயந்தாங்குள்ளி பயபுள்ள!)

  உள்ளே அகப்பட்டு கொண்டவனுக்கு, அண்ணனும் தம்பியும் மாறி மாறி தர்ம அடி கொடுக்க - வலி தாளாமல், கொள்ளை அடிக்க வந்தவன்,  முழங்கால் படியிட்டு இருவரிடமும், "தயவு செய்து 911 call போட்டு போலிசை கூப்பிடுங்க. அவர்கள் வந்து என்னை காப்பாற்றட்டும். நீங்கள் கூப்பிடுகிறீர்களா? இல்லை, நானே போன் செய்து கூப்பிடவா?" என்று கேட்ட பின் தான்,   அடிப்பதை நிறுத்தி விட்டு,  அவனை கட்டி போட்டு விட்டு போலீஸ்க்கு போன் கால் போட்டு இருக்கின்றனர். சில நிமிடங்களில் போலீஸ் வந்ததும்,  அவர்களை கண்டு ரொம்ப சந்தோஷப் பட்டது கொள்ளை அடிக்க வந்தவன்தான்.   "போலீஸ்சில் கூட என்னை அடிக்க மாட்டார்கள். இவர்கள் என்னை பதம் பார்த்து விட்டார்களே," என்றபடி நிம்மதியாக போலீஸ் காரில் ஏறி கொண்டான்.  Miami Herald Newspaper ல இந்த நியூஸ் வந்த பொழுது, அதை படித்து விட்டு, ஒரே சிரிப்புதான்.

நடந்து செல்வதற்கு பதில், சில போலீஸ் உபயோகப் படுத்தும் Segway என்ற வாகனம்:   

அவ்வப்பொழுது,  இப்படி செய்திகளையும் தொடந்து எழுதுகிறேன்.......